هز شراقى الرواح
**********************
بيني وبينك..
خطوة ودمعة وعقب سجاير
داير وشك
ما انت نعامة ف رمل ضفاير
عاشق نفسك
زى مراية ليل ونهار
ركبك جن
بينفخ غيك بالمزمار
هايم قايم
فارد ظنك زى جناح
تقدر تخلف
ما انت عوايدك رعد وبرق
وخوف ورياح
عمر سحايبك
كان فى مخاضها مطرة
تهز شراقى الرواح
بصباح
عمر منارتك
كانت شط حبيب راح يغرق
أو مصباح
يرحم يوم وانت بتندهلى
ورعشة قلبك قبل اديك
دايما ناسى
لما بقيت لك لعبة ودمية
نارك حامية
بس عليك
انسى الشجرة وضل وريفها
ماانت عارفها
ما بتديش من غير احلامها
تبقى ضمير وحياة
وانت سقيتها خداع منقوع
الحيلة
رسمة طويلة لفيل الحب
ما بتعرفشى تكون منجاة
حزم كل حقايبك وامشى
يمكن لما تحس الغربة
تحمل قربة
وتسقى الناس
ليست هناك تعليقات:
إرسال تعليق